Síðustu vikur hafa verið viðburðaríkar.  Eftir sigur hjá Ísólfi í gæðingafimi í Meistaradeild VÍS var komið að fimmgangi.  Þar varð Ísólfur í 2-3 sæti eftir glæsilega sýningu í forkeppni. Í úrslitunum gekk líka vel en keppnin var sterk og fyrir skeiðið voru Ísólfur og Sólbjartur í 5.sæti.  Eftir þrjá magnaða skeiðspretti þar sem þeir sýndu frábært samspil og kraft uppskáru þeir glæsieinkunnir og sigur í höfn.  Þeir félagar brunuðu svo norður aftur á föstudagsmorgni og á mánudegi var Ísólfur kominn aftur suður í sjónvarpsviðtal fyrir þátt Meistardeildarinnar.  Í sömu viku var svo sýndur þáttur á stöð2 um uppbygginguna á Lækjamóti, byggingu Sindrastaða.  Þann þátt má sjá á vefslóðinni http://www.visir.is/section/MEDIA99&fileid=CLP34215 en við höfum fengið mjög jákvæð og góð viðbrögð við þættinum og þökkum kærlega fyrir það.

Næsta mót í Meistaradeild VÍS er tölt og er Ísólfur þegar þetta er ritað að undirbúa sig til að keyra af stað suður til að taka þar þátt. 

Húnvetnska liðakeppnin er byrjuð og tók Lækjamótsfólk að sjálfsögðu þátt í henni.  Úrslitin og myndir fáum við lánuð af heimasíðu hestamannafélagsins Þyts. En þar má sjá að okkar fólki gekk vel, Guðmar var glæsilegur í pollaflokki, Eysteinn sem kemur til okkar einu sinni í viku að þjálfa og vinna í hesthúsinu sigraði barnaflokkinn. Karítas sem kemur þrjá daga viku að þjálfa og vinna hjá okkur varð í 2.sæti á hryssunni sinni Völu frá Lækjamóti en sú er einungis á 6.vetur og undan Sindra frá Leysingjastöðum. Gerður Rósa sem er tamningakona hjá okkur á Sindrastöðum varð í 4.sæti í 2.flokki á Sýn frá Grafarkoti.  Í 1.flokki sigraði svo Vigdís á Sögn frá Lækjamóti og Ísólfur varð annar á Gulltopp frá Þjóðólfshaga.  

Ísólfur og Gulltoppur frá Þjóðólfshaga

Gerður Rósa og Sýn frá Grafarkoti

Guðmar og Valdís frá Blesastöðum